filu' |
|
|
Eh si, mimì! Proprio lei! Giuro che ho avuto proprio una botta di... ehm...  fortuna! 
Complicatissimo ascoltarla e scriverla, ogni tanto la cercavamo, ma senza risultati.
Oggi mi ci sono imbattuta per puro caso, cercando altro. Quando ho letto il titolo, ho pensato che fosse come al solito: titolo senza il testo... e invece... sorpresa!
Da "La gatta Cenerentola", favola in musica di Roberto De Simone, "La scena delle ingiurie"
MATRIGNA: Fermi tutti. Un momento! ... Un momento! ...
La chianella l'ha persa proprio mia figlia!
ASSO DI BASTONI: Ué! ... Non interrompè!... Si la chianella vuole provè...
Assetté! ... E 'nzieme all'ate aspettè!
MATRIGNA: Eh!... e non t’ incazzè!...
(Poi sedendosi e rivolgendosi a Patrizia con intenzione)
Assèttate a mammà... pecché la chianella l'hai perza
propetamente tu!
PRIMA LAVANDAIA: (facendole il verso) Hé capito a mammà ?... Assettate,
pecché la chianella l'hai perza propetamente tu!
PATRIZIA: Mammà... chella sfotte...
MATRIGNA: Chi, a mammà?
PRIMA LAVANDAIA: Nun è overo!
PATRIZIA: E ssì pure busciarda!
PRIMA LAVANDAIA: Ué... teterené !... Abbada a comme parle, si no la chianella
te la faccio trasire pe' bocca!
PATRIZIA: A me ?....
PRIMA LAVANDAIA: Eh... a te!
PATRIZIA: Vaiassa!
PRIMA LAVANDAIA: Chesto a mme ?
PATRIZIA: Eh... chesto a tte!
ASSO DI BASTONI: Chesto ‘o figlio d’ ‘o rre!
PATRIZIA: (sempre alla prima lavandaia) E hai raggione che non mi
posso abbassare con te... ca si' na lavannara!
MATRIGNA: Lavannara!
PRIMA LAVANDAIA: Ué... scampolo d’allesse! ... Nun te permettere... ossa' !
MATRIGNA: Scampolo d'allesse... a mia figlia ?...
Mmesura sta valanza o te faccio 'mparare la crianza!
TERZA LAVANDAIA: Chi parla de crianza!... Verite!... sta janara!
MATRIGNA: Sfelenzia!
SECONDA LAVANDAIA: Scigna!... roseca cucchiara!
MATRIGNA: A tte... e a sti caiotole!
PRIMA LAVANDAIA: (alzandosi lentamente dalla sedia) Comm' hè ritto ?...
ASSO DI BASTONI: (andando alle sue spalle e con tono insinuante) Ha ritto
caiotole... proprio accussí!...
MILITARE SPAGNOLO: Caiotolas ?. . . Caiotolas !
PRIMA LAVANDAIA: (alla matrigna) Ma viene 'a ccà... ca cchiú non m'ammesuro
e te 'ncaso rint' 'o cufenaturo a te e a sta pirchipetola
PATRIZIA: Pirchipetola a me?... Cacatrònole!
MATRIGNA: Come dici bello, a mammà
PRIMA LAVANDAIA: (minacciosamente) Comm’hè ritto?...
ASSO DI BASTONI: (andando alle sue spalle come prima) Ha ritto cacatrònole...
aggio 'ntiso bbuono!
PRIMA LAVANDAIA: (ad Asso di Bastoni) Oini’ ... ma tu stai' sempe arreto a me?...
E va' cammina!... Va'!
MILITARE SPAGNOLO: (indicando la prima lavandaia) Cacatrònolas ? Cacatrònolas !
PRIMA LAVANDAIA: Eh... haggio capito! ... (a Patrizia) Culumbrina!... Si te metto
li mmane a cchesti zervole te faccio lu strascino! . .. e po' fa'
veni' a mammeta ca te fa tanta vierre e tanta vruoccole ca
pruvarrà che piso hanno sti zuoccole!
MATRIGNA: A chi fai pruva' zuoccole ?... Si m'abboffa la guallera ca
schiatto ve smafero lu mazzo a tutt'e quatto!
PRIMA LAVANDAIA: (sorridendo ma con ira trattenuta) Tu... smafare la Pasca ca
te 'nfrasca pe' lu ffrisco a la ventresca... Io... si t'afferro ca
nun m'avota lu stommaco, te sfraveco sta faccia de candero,
te ammatonto chist'uocchie, te scommo 'e sango e po' te
sguarro ccà mmiezo!
( Le lavandaie applaudono. )
MATRIGNA: Aspetta a mammà. Sta’a sentì. Comme se io po'... nun
sapesse risponnere a na chiarchiolla, guitta, spitalera,
sorchiamucco, jetta-cantaro, pisciapettola, muzzecutola,
merdosa e bavosa comm'a tte!
ASSO DI BASTONI: Oh... che minuetto!
PRIMA LAVANDAIA: Mò ve faccio senti’ ‘a quadriglia!... (Alla matrigna)
E io mò... pe' sfila' la maglia comme se compete, avarria 'a
tene' la stessa Vocca ca tiene tu...
MATRIGNA: Ma nun la tieni..
PRIMA LAVANDAIA: e no…pecchè siccome la Vocca mia addora 'e rose e sciure...
sa' che te rico papera guallarosa, caccia-munnezza, annetta
latrine, stuppagliosa, lava-mappine ca nun si' ata?... Ma va' te
ietta rint' a na chiaveca maesta e mbruscinece sta lengua pe'
ddinto... va'!
ASSO DI BASTONI: Ih che rose e sciure!
MATRIGNA: Sti parole toie... me vanno linte e pinte 'nfaccia a stu culo
sulo pe' cacartele n'ata vota rint'a stu cannarone fraceto ca
tiene!
PRIMA LAVANDAIA: Ca tiene tu... e chella meza pruvasa 'e figlieta!
PATRIZIA: (inferocita) Lassateme oima'... ca la voglio ricama' sta faccia
cu chest'ogne!...
PRIMA LAVANDAIA: Ma che vvuo ricama’ !... Oine’ ma va' cammina! Tie'...
apàrame sta mappina! (Le lancia uno straccio sul viso).
ASSO DI BASTONI: Bonanotte!... mo vene ll'ammuina!
PATRIZIA: Mammà falla ferni' a sta pettulella... Brutta cula 'e tianella!
ASSO DI BASTONI: Musica!... ca s'abbìa la tarantella!
Musica (Coro dei soldati).
I soldati riprendono dolcemente il loro canto di conquista e di elogio per le bellezze femminili. Contemporaneamente comincia un ritmato fuoco di fila di insulti tra la matrigna e Patrizia da un lato e le lavandaie dall'altro. Al centro Asso di Bastoni dirige questo concertato finale prendendo gusto allo scontro e al contrappunto tra tutte le parti.
CORO DEI SOLDATI: Son sei sorelle… son tutte belle.. son.. tutte belle per far l'amor! … Son sei sorelle.. son tutte belle.. son tutte belle per far l'amor!
MATRIGNA: Fuchèra!
LAVANDAIE: Capèra!
PATRIZIA: Chiachièra!
LAVANDAIE: Chiazzèra!
MATRIGNA: Lumèra!
LAVANDAIE: Trammèra!
PATRIZIA: Culèra!
LAVANDAIE: Spitalèra!
MATRIGNA: Funnachèra!
LAVANDAIE: Concola 'e cantenèra!
PATRIZIA: Maneco 'e cafettèra!
LAVANDAIE: Cupierchio 'e 'nzalatèra!
MATRIGNA: Sfúnnolo 'e cemmenèra!
ASSO DI BASTONI: Anarié! ...
LAVANDAIE: Crepo si nun te ciacco a tte e a sta vecchia rósecatabacco!
MATRIGNA: Brutta faccia de voia!
LAVANDAIE: Mièttence chesta toia! St'uocchie cu li ricotte sta vocca de latrina
sti diente a ceucenàro si viene 'a ccà t'ammacco lu panàro.
ASSO DI BASTONI: Avoté! . .. e ffaciteve n'atu sciassè!
MATRIGNA: Ah! ... ca te sia tagliata chesta lengua spuntata ca chiove a cielo
apierto e pare nu zerri-zerro Va'! ... ca te pozza venire la pepítola!
LAVANDAIE: E ca tu pozza arrunchiare comm'a ccótena 'ncopp'a li gravune!
MATRIGNA: Zandraglia perugliosa!
LAVANDAIE: Guaguina jetta-cantaro! Cacatallune a tte e chi sta cu ttico!
MATRIGNA: Làvate 'a Vocca si parle cu mmico!
LAVANDAIE: Mora dint'a na fossa si nun te rompo st'ossa!
PATRIZIA: Piera storta de papera!
LAVANDAIE: Tallune fatte a pprovola! Uocchie de ceca-voccola!
MATRIGNA: Naso de cacciuttella
LAVANDAIE: Brutta scigna cacata!
ASSO DI BASTONI: E mmò facite ll'urdema sparata!
MATRIGNA: Zellosa!
LAVANDAIE: Fetosa!
PATRIZIA: Merdosa!
LAVANDAIE: Zandragliosa!
MATRIGNA: Perucchiosa!
LAVANDAIE: Voccola rognosa!
PATRIZIA: Maneco 'e scopa 'nfosa!
LAVANDAIE: Forbice ca taglia e cose!
MATRIGNA: Pettula chin' 'e pertose!
LAVANDAIE: Janara catarrosa!
MATRIGNA: Aucellona 'nzevosa!
LAVANDAIE: Gatta cecata!
PATRIZIA: Tozzola spugnata!
LAVANDAIE: Pereta 'mbarzamata!
MATRIGNA: Trummetta scurdata!
LAVANDAIE: 'Rancascia scuncecata!
PATRIZIA: Vrenzula spurtusata!
LAVANDAIE: Furnacella sfunnata!
ASSO DI BASTONI: E mmò sfucate!… e pigliateve a mazzate!...
|
| | |
